كتر الكلام فالأيام الأخيرة عن الإخوان و الإسلاميين ولا السلفيين و سرقتهم للثورة و جهودهم لتحويل الدولة للنظام الدينى إلخ....
أولاً احب اشرح إن الإخوان شىء و السلفيين شىء آخر. تركيز الإخوان الأول و الأخير هو على السلطة و الحديث بإسم الدين و لكن السلفيين ليس لهم علاقة بالسياسة او الإعلام و كل هدفهم المحافظة على الدين اللإسلامى كما كان أيام الصحابة و نشر تعاليمه الصحيحة – من وجهة نظرهم –
الدافع للكتابة عن موضوع زى دة كان حالة الإستغراب اللى انا فيها لما تشوف الإخوان يدعون لدولة مدنية و أجندتهم و علمائهم صرحوا أكثر من مرة بمعارضتهم للديمقراطية!! و مثال بسيط على ذلك كلام وجدى غنيم عن الديمقراطية و أحب اكتب جزء من ندوة ليه
عندما قال "عندنا شورى معندناش ديمقراطية. إحنا مالنا و مال الديمقراطية؟ احنا اللحمة بتاعتنا خرفان و بقر و جاموس و جمال و بط و وزر الخنزير مش بتاعنا. عندنا كل دة و رايح تمسك فالخنزير؟ ايه الديمقراطية فكدة؟ ليه تقول الديمقراطية و ناخد حاجة من برة؟ يبقى عندى أكل جميل مراتى عملاه و اجيب اكل من برة ليه؟ الديمقراطية قائمة على كفر و العياذ بالله .. " طبعاً مش هعلق على الكوميديا السوداء اللى فالندوة و يكفينى اقول إن الديمقراطية عنده عاملة زى البط و الوز و البقر مش اكتر.
فالنأتى للسلفيين حتى لا نطول... صرح الشيخ أحمد فريد (قيادى سلفى بالأسكندرية) لجريدة الشروق بتاريخ 5 مارس 2011 أن الفترة القادمة سوف تشهد امتداداً للسلفية بكل محافظات مصر و إعتذامهم إنشاء حزب سياسى و لكن ليس هذا ما يهم. فالقد صرح أنهم "لم يشاركوا فالثورة بحجة وجود خلط بين النساء و الرجال و تتضمن شعارات غير مرغوب فيها مثل رفع الصليب". و هذا يكفى و يمكنك قراءة الحوار كامل لاحقاً.
أخيراً .. حيث إن السلفيين لم يشاركوا فى الثورة – اللى جابت حق سيد بلال اللى بيتحججوا بيه و جابتلهم حقهم من أمن دولة – أظن إن من حق كل مصرى يشوف أفكارهم حتى لا ينخدع بمن يتحدثون بإسم الدين. فلو سمع المصريين هذا الكلام قبل 25 يناير و أطاعوه لما كنا نشهد المعجزات الحاصلة الآن فى كل أنحاء مصر. و كذلك الإخوان المتسترين خلف ثياب الدولة المدنية لن ننسى لهم تصريح ما قبل الثورة حين قالوا "لن نشارك بشكل رسمى و لكننا لن نمنع شباب الإخوان من المشاركة" .. صباح الذكاء عشان نظام "لو نجحت زى الفل و لو فشلت احنا مع الحكومة و كله تمام" ... أرجو من كل مصرى مراجعة تاريخ كل جماعة منهم حتى لا يقع فريسة للمتاجرين بإسم الدين.
لينك الندوة لوجدى غنيم : اضغط هنا
لينك حوار أحمد فريد للشروق: إضغط هنا
لينك الندوة لوجدى غنيم : اضغط هنا
لينك حوار أحمد فريد للشروق: إضغط هنا
