بيان للناس .. من واحد من الناس

السؤال الأول: إنتا مين؟

ج1: أنا واحد من الناس.. اللي نزلت التحرير، واتظاهر مع الناس.. وحيزل تاني وثالث لحد ما نحقق مطالب الناس.

س2: عايز إيه؟

ج2: عايز بلدي تتغير للأحسن، عايز حياة حرة كريمة، عايز مجلس شعب بيعبر عن الناس، وحكومة بتسعى لمصلحتهم، ووظايف كريمة ومرتبات معقولة تخليني أسافر وأتفسح وأعيش عيالي. ودا مش حيتحقق بشوية تعديلات ولا إجراءات بسيطة، لازم عمل دستور جديد وقوانين جديدة تسمح بالحريات وتدي حرية الاستثمار ويبقى فيه شفافية ومحاسبة للمسؤولين عشان البلد تتقدم.

س3: ما إحنا كلنا عايزين كدا ، بس التظاهر حيعمل حاجة؟

ج3: يعني هوا السكوت عمل حاجة؟ وبعدين أيوة التظاهر حيعمل حاجة، إحنا مش عايزين نتظاهر بس الحكومة مسبتش طريق تاني لينا، مجلس الشورى احتلوه، مجلس الشعب زوروه، رئاسة الدولة هوا واحد مشفتش غيره وابن حيحصل أبوه. يبقى مفيش غير التظاهر.. والنتيجة قدامنا في تونس وفي دول أمريكا اللاتينية وفي أوروبا الشرقية الناس وقعوا أنظمة من أشد المستبدين وحققوا مطالبهم. وحتى في مصر لما المصريين انتفضوا ضد السادات الأول سماها ثورة حرامية وبعد كدا مقدرش يعمل حاجة غير انه يرضخ لمطالب الناس.

س4: بس إنتو حتخربوا البلد، ولعتوا الشارع وضربتوا الأمن!

ج4: إحنا مظاهراتنا كلها سلمية، وبنأكد على كدا دايما، وأي حد بيحدف طوب بنبدأ نهديه ونمنعه، لكن لما الأمن يضربنا بقنابل وحجارة ورصاص مطاطي وحي.. من الطبيعي أحيانا الغضب يخلي البعض يرد على العنف بالعنف. لكن دا استثناءات. والدليل إن لحد دلوقت كل المظاهرات محصلش فيها أي إصابات إلا لما الأمن بدأ يتدخل بعنف.

ودلوقت فيه ميليشات تبع الأمن بتخرب في السويس لتشويه مطالب الشعب السلمية. والضمانة الحقيقية لسلمية المظاهرات هوا إنك تنزل تتظاهر.. لما أنا وانتا.. أمي وأمك.. ابني وابنك ينزلوا المظاهرات ساعتها محدش حيقدر يحرفها عن مسارها السلمي.. وأي محاولة حتبقى مكشوفة ومفضوحة.

س5: بس إنتو كلكم إخوان وعايزين تحكمو البلد!

ج5: إحنا مش إخوان، أكيد فيه بين المتظاهرين شوية إخوان، بس الإخوان في الآخر قلة وسط الشعب.. والتظاهرات بدأت من مجموعات مستقلة تماماً كفرت بالأحزاب السياسية وبالإخوان.. بدأت من واحد زي خالد سعيد اللي قتلوه وعمره ما اشتغل في السياسة. ولو الإخوان أو غيرهم حاولوا يركبوا مطالب الشعب إحنا حنوقفهم.

والضمانة الحقيقية إن لا الإخوان ولا غيرهم يركبوا على مطالب الشعب هوا انك تنزل تتظاهر لأن كووول الأحزاب في الآخر هيا قلة وسط الشعب .. واحنا مش عايزين نستبدل ظالم بظالم ، ومستبد بمستبد، إحنا عايزين تغيير كامل للنظام.

س6: بس يعني هوا مين حيحكم إذا مكنش مبارك ولا ابنه؟

ج6: إحنا مش يهمنا مين يحكم بقدر ما يهمنا إزاي حيجي، لازم يجيي بانتخابات حرة نزيهة تعبر عن إرادة الناس، ويبقى فيه تحديد لصلاحيات الرئيس ومجلس وزراء فعال، ومجلس شعب يقدر يستجوب أي وزير ويسقط أي حكومة.. وساعتها بس، ساعتها بس ميهمناش مين يحكم لأنه مش حيقدر يلتف على مطالب الناس.

وكمان أنا متأكد 100% وعارف إنك عارف زيي إن مصر مليانة بالكفاءات المهاجر منهم واللي جوا مصر بس مش باينين مش ظاهرين لأن اللي ظاهرين دلوقت ع السطح معظمهم هما شلة العصبجية والحرامية اللي ناهبين البلد، ومن الطبيعي إن أي كفاءات شريفة مش حتبقى معروفة للناس.

س7: يعني أنا مطلوب مني إيه دلوقت؟

ج7: مطلوب منك تنزل تشارك فوراً، بالتنسيق مع أصحابك وزملائك، انزل شارك، خد مراتك وأولادك وانزل أي مظاهرة قريبة.. طبعاً لازم تخش على النت وتتابع الأخبار من مصادر موثوقة وتشوف الفضائيات ونبطل بقى نصدق الهبل اللي بيتكتب في جرايد الحكومة وتلفزيون القناة الأولى. بس حتى المتابعة مش كفاية.. لازم تنزل وتشارك، وبيني وبينك يوم الجمعة .. وصدقني لو نزلت الثورة دي حتبقى بتاعتك انتا.

س8: بس مش احتمال أتعور أو اعتقل أو حتى أموت؟

ج8: كلها احتمالات واردة، بس عايز أقولك إن شعب تونس أسقط النظام في 29 يوم ومات فيه 90 شهيد بس، وشوية معتقلين خرجوا على طول، ونظام تونس كان أكثر استبداداً من نظام مبارك بكثير. وعايز أقولك إن الظباط والعساكر دول في النهاية جزء من الشعب وأهلينا واخواتنا وأكيد لما ننزل كلنا مش حيقدروا يعملوا حاجة غير انهما يستسلموا لمطالب الشعب ويرفضوا طاعة المستبدين الظلمة اللي فوق، زي ما الجيش عمل في تونس ووقف جمب الشعب.

والأهم من كدا هو إننا بنعمل تقدير ضخم جداً لقوة النظام وهوا في الحقيقة ضعيف جداً وهش جداً بس بيحكمنا بثقافة الخوف.. وهوا دا اللي لازم نكسره.. صدقني لو نزلت مظاهرة فيها خمستلاف واحد وقدامك خمستلاف أمن مركزي مش حيقدروا يعملوا حاجة غير إنهم يسيبكم تتظاهروا.

والدليل هوا مظاهرات 25 و 26 يناير أكثر من 20 ألف متظاهر في كل محافظة من محافظات مصر، شوف يطلعوا كام بقى، ومع ذلك عدد المعتقلين كلهم حوالي ألف خرج نصهم يمكن، ومات 5 تقريبا.. شوف النسبة.

ومفيش تغيير من غير تمن.. إن الله لا يغير ما بقوم حتى يغيروا ما بأنفسهم..

س9: أديك قلتها بعظمة لسانك ، نغير ما بأنفسنا الأول!

ج9: أيوة هوا دا المطلوب، بس احنا فاهمينه غلط، مش المطلوب انك تصلي ولا تصوم في المسجد أو الكنيسة وتدعي ربنا زيادة، كل دي حاجات حلوة ومطلوبة ومحدش قال حاجة، لكن في النهاية هي من حقوق الرب على العباد، ولما تقصر فيها ربنا يحاسبك عليها لوحدك، وممكن برحمته يغفرلك، لكن حقوق العباد على العباد هيا الأهم وهيا اللي بيقوم بيها صلاح الدنيا والآخرة معاً.. وربنا ميغفرهاش إلا لو الناس نفسها سامحتك.. إنك تقول للظالم لأ.. إنك تعلن عصيانك وتنزل تتظاهر لأني زي ما وضحت من شوية مبقاش فيه طريقة تاني.. حقوق العباد على العباد إنك تصرخ بعلو الصوت.. ودي مش حق ربنا عليك وبس دي من حق بلدك عليك من حق الناس عليك .. كل واحد مننا مسؤول عنها..

مش قلت لك إنك تقدر تبقى.. واحد من الناس؟

اطبع البيان دا ووزعه على أكبر عدد من الناس.. موعدنا معاً يوم الجمعة من المساجد والكنائس.. نخرج سوية نتجه للميادين والشوارع ونقولها بعلو الصوت.. كفاية خوف كفاية موت.. إحنا قررنا نعيش.